കാമുകിയുടെ കുഴിമാടം തേടി മഞ്ചേശ്വരത്ത് നിന്നും കണ്ണൂരെത്തിയ കാമുകനെ കാത്തിരുന്നത് വമ്പൻ ട്വിസ്റ്റ്. 21കാരനായ കാമുകനാണ് കാമുകിയുടെ കുഴിമാടമെങ്കിലും കാണാനായി എത്തി പറ്റിക്കപ്പെട്ടത്. സിനിമയെവെല്ലുന്ന കഥയിങ്ങനെമൂന്നുമാസം മുൻപാണ് യുവാവും പത്തൊൻപത് വയസുള്ള പെൺകുട്ടിയുമായി അടുപ്പത്തിലാകുന്നത്. ഫെയ്സ്ബുക്ക് വഴിയാണ് ഇരുവരും പരിചയപ്പെട്ടത്. അടുപ്പം പ്രണയമാകാൻ അധികം സമയം വേണ്ടിവന്നില്ല. സുഹൃത്തിന്റെ ഫോണിലൂടെയാണ് പെൺകുട്ടി യുവാവിനെ വിളിച്ചിരുന്നത്. പതിവ് പോലെ ഒരു ദിവസം ആ നമ്പരിലേക്ക് വിളിച്ച കാമുകന് കേട്ടത് ഒരു അശുഭവാർത്തയായിരുന്നു. കാമുകി മരിച്ചുവെന്ന് സുഹൃത്ത് പറഞ്ഞു.
ഇതുകേട്ട് സങ്കടം സഹിക്കാതെയാണ് കാമുകൻ കുഴിമാടമെങ്കിലും കാണാൻ ഇറങ്ങിപ്പുറപ്പെട്ടത്. പെൺകുട്ടി യുവാവിനോട് വീടും സ്ഥലവും മറ്റ് വിവരങ്ങളുമൊന്നും വെളിപ്പെടുത്തിയിരുന്നില്ല.
ഇതിനാല്‍ തന്നെ സുഹൃത്തിനൊപ്പം കണ്ണൂരിലെ മട്ടന്നൂര്‍, ചാലോട്, ചാവശ്ശേരി മേഖലയിലെ പള്ളികളില്‍ എല്ലാം കുഴിമാടം തേടി അലഞ്ഞു. ഒടുവില്‍ പൊലീസ് സഹായം തേടിയപ്പോഴാണ് സത്യാവസ്ഥ പുറത്തുവരുന്നത്. പെൺകുട്ടി വിളിക്കാറുള്ള നമ്പരിൽ പൊലീസ് ബന്ധപ്പെട്ടു. അപ്പോഴാണ് കാമുകിയ്ക്ക് അപകടമൊന്നും സംഭവിച്ചിട്ടില്ലെന്നും യുവാവിനെ ഒഴിക്കാൻ മരണം വ്യാജമായി കെട്ടിചമച്ചതാണെന്നും അറിയുന്നത്.
